唔知大家有無留意，今屆奧運，多咗唔少十三、四歲嘅選手。佢哋好多都集中於新世代項目，例如BMX、滑板、室內攀石等。
比賽時，佢哋天真無邪，無咗成年運動員為國爭光同對自己要求甚高嘅包袱，佢哋更享受比賽，以及互相 「集郵」、結交朋友。失敗了就互相support，各人都好enjoy，同埋係為自己而戰。不過，咁唔代表佢哋比起成年運動員少訓練同埋無咁刻苦。佢哋從小就花時間訓練，各人都身懷絕技，喺家人同國家嘅支持下為國征戰，同時間亦不忘學習，需要上堂同埋做功課，生活同正常人無異。
當中一位就係現年13歲、代表英國出戰滑板賽嘅銅牌得主 Sky Brown。
作爲當地最年輕嘅奧運奪牌選手，大家可能以爲佢細細個就受到專業訓練，但原來佢係喺YouTube自學成才，邊睇邊學踩板技巧，憑住過人天賦同不懈努力，最終喺國際賽事創造奇跡！佢嘅故事向我哋證明，只要有心，就算唔跟隨傳統，一樣可以實現心中理想。小朋友係咁，大人亦如是。放手畀小朋友一試，話唔定會有意外驚喜。
Sky喺滑板界固然成就非凡，不過佢嘅運動員生涯並非一帆風順。舊年五月，佢喺練習期間意外由U形池高處跌落，頭部同手部傷勢嚴重，更試過陷入昏迷，但佢一一撐過，好快逃出鬼門關，跟住就重新投入訓練。面對不幸，佢人仔細細卻有無比勇氣，喺父母支持同陪伴下，以樂觀嘅態度不斷挑戰極限，實在值得我哋學習。
除咗踩板之外，Sky亦熱愛滑浪，享受同屋企人征服大海，可謂多才多藝。滑浪同踩板都屬於極限運動，講求技巧之餘，亦鼓勵人主動發掘自己嘅潛能，正好提醒我哋要敢於畀小朋友跳出舒適區，跌吓撞吓板先會成長。學Sky話齋：「勇敢啲，做個强大嘅人，享受其中，全力做你愛嘅事！」
13歲走得上世界舞台，仲有時間做youtuber同經營Instragam，唔係父母放手，放心讓孩子去闖，一定無可能做到。Sky更人如其名，天空之大，無窮無盡。或者您嘅小朋友與她同齡或只差幾歲，她做到了，唔通自己小朋友會輸蝕嗎？
圖及文: 港講廣團隊
Comments