半魚半人嘅下一代：由香港盧亭講起

啱啱過去嘅星期日（7月26日），英國曼徹斯特街頭再次熱鬧起嚟，迎來一年一度嘅 Manchester Day。今年巡遊入面，香港文化社（Hong Kong Cultural Community）聯同 PlayMud 同 Wio Dance Studio 一齊登場，仲呼應英國將 2026 年定為「全國閱讀年」（National Year of Reading），以香港作家西西《浮城誌異》入面嘅「浮城」做靈感，將香港嘅故事由書本帶到街頭。一艘色彩鮮明、充滿香港味道嘅「漁船」駛入巡遊隊伍。船上載住嘅，唔單止係香港文化同回憶，仲有我哋對「歸處」呢件事嘅想像同追問。

而掌舵嘅，正正就係香港民間傳說入面嗰個好特別嘅角色——盧亭。

｜傳說中的「盧亭」：半魚半人，既似旅人亦似歸人

喺嶺南民間傳說同《廣東新語》入面，盧亭係大嶼山一帶半人半魚嘅神秘族群。相傳東晉末年，盧循兵敗之後，部下逃到香港沿海一帶，為咗避開朝廷追捕，長年隱居海邊、靠海為生。久而久之，呢段經歷喺後人想像之中，就慢慢變成咗「盧亭」呢個半人半魚、游走喺海同陸之間嘅存在。

而盧亭最特別嘅地方，就係佢唔完全屬於海，亦唔完全屬於陸地。佢企喺中間，似旅人，又似歸人。

當盧亭今次喺 Manchester Day 出現，佢唔只係一個神話角色，仲好似一個說書人，帶住大家重新諗香港、諗漂泊、諗身份。

老實講，盧亭真係好似我哋。

｜我們都是漂泊的盧亭

而家散落喺英國、加拿大、澳洲、台灣、日本，甚至世界各地嘅香港人，某程度上，都活像盧亭。以前喺香港，我哋有熟悉嘅語言、生活節奏、工作方式；但嚟到新地方，一切都要重新學過：點樣適應制度、點樣理解文化、點樣喺陌生嘅地方安頓自己。

我哋帶住香港嘅記憶、習慣、味道同價值觀落腳異地，但同時又努力學識融入新生活。結果就係，我哋慢慢變成一種夾喺中間嘅身份：唔再完全係以前嗰個自己，但又未必會成為一個徹底本地化嘅人。

而最值得我哋深思嘅，可能仲唔止係我哋自己，而係下一代。

｜重新審視身份：身為家長，以及我們的下一代

今次曼城日巡遊以「閱讀」與「說書」為主軸，讓我哋深思：在離散的歲月裡，我哋作為個人、身為父母，以及我哋下一代既身份認同度？

巡遊團隊以文字提醒：「未來最有競爭力的人，不是最會使用 AI 的人，而是最懂思考的人；而最好的思考，往往都是從閱讀開始。」在演算法與 AI 充斥既時代，閱讀能帶比我哋走出「資訊同溫層」，訓練獨立思考與同理心。而對於移民家庭來說，「說故事」與「閱讀」更是文化傳承與身份對話既核心。

我哋必須坦然面對事實：我哋下一代，不會是「純粹的香港人」。

孩子在英國、加拿大、澳洲、台灣或者日本的學校長大，講流利英語、國語或日語，接收著當地的價值觀與生活習慣；但返到屋企，他們聽廣東話、食嘅係港式食物。佢哋就像盧亭一樣，擁有一套全新且雜糅既基因，就像澳門土生葡人與馬來西亞峇峇娘惹。

我哋相信大家身為父母也不會強求孩子成為與我哋一模一樣既「純香港人」，亦唔需要為佢哋逐漸英化或在地化而感到無奈。相反，我哋既責任就像巡遊中的盧亭說書人一樣，繼續講述香港的故事。講香港嘅文學，講香港嘅歷史，講我哋以前點樣生活，記得啲咩，懷念啲咩。再透過閱讀、透過文化活動、透過日常生活入面細細小小嘅延續，讓佢哋知道，自己同香港之間，其實一直都有一條線連住。

｜結語：航向未知處

Manchester Day 呢艘船打動人嘅地方，就係佢唔只係一次表演，而係將好多離散港人一直放喺心入面嘅未知，溫柔咁帶咗出嚟。

「浮城」會漂，但只要船仲喺度，只要故事仲有人講，只要仲有人記得，嗰份連結就唔會消失。

註 : 感謝香港文化社（Hong Kong Cultural Community）提供當日活動相片