喺英國長大，都要識咩係香港特式嘅中秋節！ (附中秋市集資訊)
中秋節，你會諗起咩？月餅、花燈、賞月，定係一家人團聚？仲有大坑舞火龍?
對於喺海外成長嘅小朋友嚟講，中秋節未必係一個熟悉嘅節日。尤其當廣東話唔一定係佢哋日常使用嘅語言，點樣令小朋友由「知道有中秋節」，變成真正理解同感受到呢個節日？
作為英國中文教育組織，我哋一直相信，小朋友學語言唔一定只係坐定定學寫字。將語言放入遊戲、勞作、故事同生活體驗入面，學習自然會變得更加有趣。
今年中秋，我哋會將「玩」同「學」結合，帶住大家一齊認識中秋文化。🏮🥮各位家長亦都可以試下自製好玩教材。
其中一個活動係 「月餅記憶卡」小遊戲。小朋友透過配對卡牌，可以自然接觸「月餅」、「紅豆」、「奶黃」等中秋詞語。家長亦可以一邊玩，一邊用廣東話問：「你搵到邊一張？」「呢個係咩？」「你鍾意邊款月餅？」由一個簡單遊戲，變成親子之間使用廣東話嘅互動機會。
另一個受小朋友歡迎嘅活動係 「透明小月亮」親子手作。小朋友親手製作屬於自己嘅小月亮，同時認識月亮、中秋、嫦娥同花燈等。對年紀較細嘅小朋友嚟講，透過視覺、觸覺同創作去接觸文化，往往比單純聽講更加容易留下印象。
但講到香港特式嘅中秋，一定唔少得大坑舞火龍！呢條巨型火龍已有過百年歷史，2011年仲列入國家級非物質文化遺產。中秋嗰幾晚，大坑街頭會出現一條長成70幾米嘅龍身，由三百幾位健兒舞動，香火配合鑼鼓穿梭喺窄巷之間，場面氣勢都相當震撼。喺英國長大嘅小朋友，唔止要識月餅同花燈，仲應該知道香港有呢種獨一無二、人情味濃嘅傳統節慶！
就算小朋友今年無機會睇火龍，但絕對可以參加我哋嘅月餅製作、皮影戲、睇中秋節立體書等活動，從語言、故事、食物到手作，讓小朋友用唔同方式認識中秋。
如果你都認同以上方法同埋想帶小朋友一齊玩，我哋誠邀大家參與我哋以下嘅中秋兒童工作坊同埋攤位:
🏮 2026 中秋活動一覽
5 Sep｜Urban Garden Mid-Autumn Festival｜Central London｜中秋市集＋月餅記憶卡
📍 Goldsmiths, University of London, 8 Lewisham Way, London SE14 6NW (Central London)
註: 免費!
12–13 Sep｜Merseyway Shopping Centre｜Stockport ｜中秋市集＋透明小月亮親子手作
📍 Merseyway Shopping Centre, Stockport SK1 1PD (Manchester)
註: 免費並鳴謝商場支助材料支出!
13 Sep｜Sale「中秋好香港」市集｜Sale｜中秋市集＋月餅記憶卡
📍 Stanley Square & School Road, Sale, M33 7ZZ (Manchester)
註: 免費!
18–20 Sep｜Leeds Corn Exchange｜Leeds｜透明小月亮親子手作+月餅記憶卡
📍Call Lane, Leeds LS1 7BR
註: 部分收費!
25–26 Sep｜Sheffield Workshop｜Sheffield｜透明小月亮親子手作+月餅記憶卡
📍16 Suffolk Road, Sheffield S2 4AG（近 Sheffield Station）
註: 部分收費!
26 Sep｜Sutton Library｜Sutton｜中秋親子活動＋月餅記憶卡
📍Sutton Central Library, SM1 1EA (Greater London)
註: 免費!
27 Sep｜Media City｜Salford｜親手製作月餅
📍Kargo MKT, Quayside Media City, Salford M50 3AG (Manchester)
今年中秋，我哋會喺英國唔同城市同大家見面。🥮🏮
一齊玩、一齊學、一齊感受中秋文化！
小編提示: 現誠徵中文正/繁體二手童書及繪本，作日後推廣香港文化及中文班學生免費閱讀計劃之用，歡迎各位於上述地點交收，感謝!
Comments