如果你放完長假返英國有「回英失落感」--- You are not alone!

每逢長假尾聲，唔少有香港背景嘅家庭都會由日本、歐洲或者其他地方返英國。旅程完結，心情難免有啲失落。由風景、節奏、美食同假期模式，一下子切換返現實，嗰種「holiday blues」好多家庭都好熟悉。

返到英國先最難受?

英國專欄作家Sean Thomas 喺《The Telegraph》〈The worst thing about Britain is arriving〉(註: 2026年7月1日)入面，提出咗一個幾傳神嘅講法，叫做 「Luton Syndrome」。佢借用「巴黎症候群」呢個概念，去形容旅客對現實落差嘅震盪：唔少英國人放完假返國，一落機就會突然感受到一種近乎幻滅嘅失落，因為英國機場入境體驗往往又慢、又舊、又亂，令人由旅途嘅輕鬆愉快，一秒跌返落現實。作者認為，最刺痛人嘅，唔單止係機場本身，而係機場好似一面鏡，照見成個英國基建、城市面貌同公共生活質素改變緊，有人形容為下滑既跡象。

文章入面，Sean Thomas 將呢種「返到英國先最難受」嘅感覺分成幾種版本。由東亞返嚟嗰種最強烈：當你喺東京、新加坡、深圳，甚至廣州機場，習慣咗乾淨、安靜、有效率、幾乎無縫嘅流程，返到英國一見到壞咗嘅行人電梯、灰沉沉嘅空間同拖慢節奏嘅人龍，嗰種落差會特別大。由法國返嚟，感受到嘅就未必係科技差距，而係美感同秩序：人哋街道整潔、店面體面，英國唔少High Street 卻似乎只有電子煙店、賭場同埋幾間連鎖快餐店。至於由美國返嚟，作者感受到嘅係另一種相對剝奪感：唔係單純窮，而係整體氣氛透露出一種「英國正在變細、變舊、變得無咁有底氣」嘅感覺。

依個 British Nationals Overseas 比 Overseas 更唔 National

對唔少 BNO visa 家庭嚟講，呢份感慨仲有另一層。明明已經返到自己生活緊嘅地方，但入境時，英國公民、部分歐洲同日本等合資格旅客可以行較快通道，自己同家人反而要排 international route，依個 British Nationals Overseas 比 Overseas 更唔 National。此外，拖住小朋友、推住行李，慢慢向前行，心入面難免會閃過一絲複雜：原來「返屋企」呢件事，有時都仲要排一條比較長嘅隊。

不過，人既心情有時都幾複雜，除咗感慨，小編有時都有啲感動。

有時第一個感動，係當 Border Force officer 望住你講一句：“Welcome home.” 可能只係好簡單兩個字，但喺旅程結束、身心疲倦嗰一刻，真係會令人突然定一定。你會知道，自己返到嚟嘅，已經唔只係一個落腳地，而係生活所在。

Home Sweet Home

另一種感動，係終於見返熟悉嘅 signage、熟悉嘅英文，唔使再估路牌、唔使再google translate。知道點樣搵行李帶、點樣出閘搭車、點樣慳返手推車既無理收費，呢種「終於唔使再轉 mode」嘅安心，其實都幾真實。

仲有一種感動，係英國入境職員有時會同你 small talk 幾句，問你去咗邊度玩、同小朋友講聲 hello，甚至見你一家大細拎住幾件行李，會自然流露一種體諒。未必係咩驚天動地嘅溫暖，但就係嗰種細細地、日常地，提醒你：呢度雖然有佢混亂同麻煩嘅一面，但都開始有屬於你自己嘅生活痕跡。